Pagadian City – Sapon sa kapulisan ang taud-taod na nga gipangita nga suspetsado sa pagpanglugos kagahapon sa buntag sa Purok Mauswagon, Brgy. Banale, Pagadian City.
Nasikop sa mga tinugyanan sa Pagadian Police Station nga pangulohan ni PSupt. Alvin Saguban ang wanted nga giilang si Conrado Aurelia 72 anyos, minyo ug lumulupyo sa nahiosgutan nga lugar.
Dihang nasayran sa kapolisan nga anaa sa dapit ang presensya sa suspetsado deretso kining giambakan sa kapolisan nga miresulta sa pagkasikop niini.
Ang suspek nasutang adunay outstanding warrant of arrest sa kasong rape nga giisyu ni Hon. Judge Analyn Ramas Costanilla sa Branch 22 sa RTC 9th Judicial Region, dakbayan sa Pagadian.
Ang dinakpan gipaslak na sa Pagadian City PNP Lock-up cell samtang naghulat sa sunod nga lakang diin nasayran nga walay pyansa ang girekominda ang korte bugti sa kagawasan sa nadakpan.
