Sirawai, Zamboanga del Norte- Despues ya sale reportao desaparecido desdel dia de sabado el sinco maga residentes del San Nicolas, Sirawai, ya considera ya con estos ahora el otoridad como maga victima de kidnapping despues que ya recivi llamada del ayer el uno del maga companyero del maga victima desde con el abductor usando el mismo cellphone del uno na sinco victima que donde ta demanda ya asegun 10 million de pesos encambio con el libertad del maga victima, pero ya hace asegun este abaja na cantidad de 75 mil de pesos durante el aca segundo llamada del abdcutor.
Accordando cae del pasao dia de Sabado, ya sale reportao “missing” canda Roger Jung-an, 36 años de edad, casao, Jomar Maglangit, 26 años de edad, soltero, Jomar Mantangan, 25 años de edad, casao, Mario Rosales, 46 años de edad, y si Reymond Purisima, 14 años de edad,todo maga residentes del mencionao lugar, donde asegun ya anda estos na sitio maasum, brgy San Nicolas para corta palo, sin embargo ya falla estos bolbe na diila residencia.
Durante el junta del Municipal Crisis Management Committee que ta encabesa el mismo alcalde del Sirawai el honorable Gamar Janihim, ya puede identifica con el maga abductor como canda Jamilon Wahab y Bating Lumiguis, con quien target ahora del pursuit operation del maga otoridad.
