Kalibo, Aklan — Indi matakos ro kalipay nga nabatyagan it mag-asawang Rose it Brgy. Fulgencio Sur, Balete, Aklan matapos nga maibalik ro andang naduea nga kwarta tag raya hay mawigit kahapon.
Ginpanawagan ni Mrs. Teresita Rose sa RMN DYKR Kalibo ro pagkaduea it andang kwarta matapos nga imaw nagpa record sa Kalibo PNP.
Suno kana nga halin sanda sa terminal it jeep nga may byahe paadto sa Fulgencio ag nagsakay it tricycle paadto sa banko para nga ideposito kunta ro nasambit nga hayga. Sa may M. Laserna nag agi ro andang tricycle nga ginsakyan.
Pag-abot sa bangko napan uhan ni Mrs. Rose nga uwa eot-a ro kwarta ag bukas ro zipper it anang daeang bag. Anda nga ginbalikan ro andang gin agyan ag uwa gid nanda makita.
Sa mayad nga swerte ay ro mga nakakita nga sanday Darlyn Lachica, 27-anyos it J. Magno St., Kalibo ag Mark Niño Betiro, 24-anyos it Brgy. Andagao nga mga trabahador it Aguila Garment and Textile sa Kalibo Shopping Center hay haagi sa may M. Laserna halin sa Capitol ag anda nakita rong naga kalhit nga kwarta.
Anda raya nga ginpueot ag gindaea sa Kalibo PNP Station ag nahauli man sa mag-asawa nga Rose. Nasayuran nga rong 75K nga balor it kwarta hay kabakeanan ko andang mga alagang baboy.
