Davao City – Nagpabilin gihapon sa evacuation areas ang 768 ka mga sakop sa tribong Mamanwa ug Manobo tribe kinsa mga apektado sa pagpang-harassed sa New People’s Army didto sa Sitio Ibuan, Brgy Mampi, Lanuza, Surigao Del Sur.
Sa interbyu sa RMN Davao kang 402nd Brigade Civil-Military Operations Officer Capt. Al Anthony Pueblas nagpadayon ang ilang gihimong clearing operations sa maong lugar diin anaa pa gihapoy presensya sa mga armado.
“Naningkamot kita mga mabugaw nato kining mga teroristang NPA nga maoy naghatag og kahadlok sa atoang malinawong pinuy-anan sa atong mga kaigsuonang tribu. Anaa ang kasundaluhan didto sa lugar aron sa pagtabang sa atong mga kaigsuonang sibilyan,” sumala ni Pueblas.
Nagpadayon gihapon sa pagtunol og relief goods ang lokal ng panggamhanan ngadto sa mga namakwit nga mga residente.
Gisaysay ni Pueblas nga gipangbaharan ang siyam ka mga pamilya sa Lumad sa mga sakop sa GFC-30 sa NPA tungod kay adunay mga anak nila nga buot musulod pagka-sundalo.
“Sa atong pakighinabi kang Barangay Mampi Kapitan Allan Juagpao, kaniadtong Pebrero 16 nagbalik-balik ang armado sa ilang sitio ug gibaharan ang siyam ka mga pamilya didto tungod kay nasayran sa mga NPA nga aduna silay mga anak nga buot musulod pagka-sundalo ug mas maayo pa nga mupahawa na sila sa maong lugar,” matud ni Pueblas.
Gisaad sa armadong kusog nga luwas nga mahibalik ang mga lumad didto sa ilang mga pinuy-anan.
RadyoMaN Aimee Guinita
