8 Barangays sa Davao Region, drug-cleared na

Davao City – Gawasnon na gikan sa droga ang walo ka mga Barangay sa Davao Region human kini gideklarang drug-cleared na sa Regional Oversight Committee Barangay Drug Clearing (ROCBDC)-XI nga gipangulohan sa Philippine Drug Enforcement Agency (PDEA)-XI niadtong Martes, Agosto 22, 2023.

Lakip sa walo ka mga drug-cleared barangay mao ang Angalan Callawa, Daliaon Plantation, 28-C Poblacion ug 35-D Poblacion sa Davao City; Barangay Batulan ug Sugal sa Jose Abad Santos, Davao Occidental; ug Barangay Datu Abdul Dadia sa Panabo City, Davao del Norte, epektibo sugod Agosto 17, 2023.

Sumala sa PDEA-XI, malampuson kining gideklara human ang pipila ka mga proseso ug deliberasyon inubanan sa mga miyembro sa ROCBDC ilabi na ang Department of Interior and Local Government (DILG) isip Vice-Chairperson, Department of Health (DOH), Police Regional Office (PRO)-XI ug Local Government Unit (LGU).

Dugang pa nga hingpit nga natuman sa mga barangay ang gikinahanglang mga dokumento o rekisitos alang sa maong deklarasyon ilawom sa Dangerous Drugs Board (DBB) Regulation Number 4, Series of 2021.

Sa kasamtangan, anaa na sa 33 ka mga barangay sa rehiyon onse ang gideklara na nga drug-cleared.

RadyoMaN Ivy Parido