Nagapanangison nga ginsaysay it waeong dag-on nga unga sa anang ina ro ginhimo nga kaeainan it anang 26 anyos nga tiyo ku Martes it hapon.
Suno sa biktima nga Grade 2 student nga nag-uli raya it alas 4:00 it hapon halin sa eskwelahan apang naghapit raya sa sapa para maghugas it underwear apang gulpi nga nag abot ro suspek. Ginpilit nga ginsueod it 26 anyos nga suspek ro anang tudlo sa kinatawo it biktima kung sa siin owa pa raya makuntento ag dayon pa nga ginhimuslan.
Matapos masayuran ro natabo, insigida nga nagpabulig sa mga otoridad ro pamilya it biktima nga nagkaresulta sa pagka aresto it suspek.
Base sa imbestigasyon ni PSSGT. Russel Miral it Batan PNP station nga bukon eang it raya ro unang kahigayunan nga ginhimuslan it suspek ro unga kung sa siin makapilang beses eon nana raya ginhimo. Gindugang pa kara nga gina taw-an it kwarta it suspek ro biktima para indi magsugid sa anang ginikanan. Nasayuran nga nagatrabaho bilang bantay it babuyan ag taeabahan ro akusado kung sa siin mag first cousin pa sanda it ina ku biktima.
Sa pihak nga parte apisar nga positibo raya nga ginturo it anang gumankon hugot ro naging pagpamalibad it suspek. Sa makaron presenteng nakakulong sa Batan PNP ro akusado ag nakataeanang pagakasuhan it Rape ag Sexual Assault.
(Pahanumdom: Bangud magparyente eamang ro suspek ag biktima, ginpakamayad it RMN Kalibo nga itago ro uyahon it suspek agud indi makilaea ro biktima.)
#TatakRMN
#RMNExclusive
