Sirawai- Patay diha-diha ang unom ka mga biktima human mibusikad ang giingong Vintage Bomb nahitabo didto sa may Sitio Washington, Brgy. Guban, lungsod sa Sirawai, sakop ning atong probinsya sa Zamboanga del norte.
Nahitabo kini mga 4:30PM niadtong adlawng myerkules nga kung diin nakita ni Marcelo Antogon ang usa ka 81mm Mortar didto mismo sa kilid sa suba sa Sitio Durian, sakop sa maong barangay.
Gidala matod pa ni Marcelo ang maong mortal didto sa Sitio Washington aron ablihan gamit ang numero kwatro (4) nga lansang ug martilyo tungod sa pagtuo nga basin adunay sulod nga bulawan. Atubangan mismo sa iyang mga silingan ug kauban sa trabaho maayong pagbusikad sa nahisgutan nga bomba.
Naila ang mga biktima nga sila si Marcelo Antogon, 21, Roel Balamban, 19, Lade Balamban, 18 Robert Timbulaan, 18, Loed Timbulaan, 9, ug Ben Timbulaan, 6,.
Dead on arrival usab ang duha ka biktima human kini gidala sa Zamboanga City Medical Center nga sila si Joefer Timbulaan, 18, ug Junrey Sango, 18.
Samtang ang 5 nga naangol padayon pang nagpaalim sa ilang mga samad didto sa nahisgutan nga balay tambalanan nga sila si Lito Timbulaan, 37, Joey Sandigon, 18, Edick Malanao, 18, Arnel Quemas, 15, ug Junrey Quemas, 13.
Sa inisyal nga taho sa Sirawai MPS pinaagi ni PSI POCHOLO ROLANDO C GUERRERO, gikabutyag nya nga ang mga biktima kadaghanan trabahante sa Sirawai Plywood and Lumber Company (SPLC).
Gi dugang pa ni PSI Guerero nga ang maong Vintage Bomb posible kining salin sa gubat tali sa militar ug mga rebelde niadtong tuig 1980. Posible nga wala kini mibuto ug natabunan sa yuta ug sa sige ug ulan na dala kini sa tubig baha.
Samtang wala usab gipasagdan sa kompanya ang maong mga biktima tungod kay gihatagan kini ug ayuda sa SPLC sama nalang sa galastuhon sa ospital ug pagpa lubong.
Sa pagkakaron padayon pa gihapon ang gihimong pag imbistiga ug pagpangalap sa mga impormasyon ang 42nd company, 13th Special forces, ug kapulisan sa Sirawai may kalabutan sa maong panghitabo.
