BACOLOD CITY – Walo ka mga tawo halin sa isa Muslim community sa Prk. Fatima, Brgy. 31 diri sa ciudad sang Bacolod ang gindakup sang mga utoridad sa ginpatigayon nga buy bust operation sadtong Sabado sang hapon.
Ang operation ginpatigayon sang City Drug Enforcement Unit sang Bacolod City Police Office, City Special Operations Task Group kag Police Station 6.
Nakilala ang apat ka mga mag-utod nga suspek nga amo sanday Bulawan, Khominee, Samsodee kag Gaonora Dimasancai, tanan pumuluyo sang amo nga lugar.
Kalakip man sa gindakup amo si Asnia Maruhom kag tatlo ka iban pa nga sanday Irene Mae Chicano, Amir Memor kag Darrel Mifa.
Suno sa utoridad narecover halin sa posisyon sang mga suspek ang isa ka daku nga pakete sang transparent plastic sang ginapatihan shabu subong man 18 ka dalagku nga heat-sealed plastic sachet sang suspected shabu.
