Dul-an otso mil ka mga drayber sa dakbayan sa Dabaw ang musalmot ugmang adlawa sa ipahigayon nga transport strike sa grupong Transmission Piston gikan alas 5 sa buntag hangtud alas 9 sa gabi-i.
Kini ang gibutyag ni Transmission Piston Davao Region Chairman Charito Duranis sa pakighinabi sa DXDC RMN Davao.
Sumala ni Duranis, ang transport strike o tigil pasada usa ka panawagan aron batokan ang plano sa Land Transportation Franchising and Regulatory Board (LTFRB) nga i-phase out ang tanang mga karaang jeep sa tibuok Pilipinas diin 15 katuig na nag operate.
Matud ni Duranis, wala pa napamatud-ang epektibo ang plano sa LTFRB nga pulihan og brand new tanang mga jeep sa Pilipinas og mugamit og hybrid, solar, ug electrical nga makina. Dugang pa niya ang maong mga modernized PUVs mokabat og 1.4 hangtud 1.6 million pesos nga mahal kaayo alang sa mga drayber ug operators. (Kasamang Merle Comidoy)
tags: Mindanao, Davao City, DXDC, DXDC 621, Merle Comidoy, Transmission Piston Davao Region Chairman Charito Duranis, LTFRB
