Kalaboso ang walong lalaki matapos na ilang beses na hindi sumunod sa ipinapairal na Enhanced Community Quarantine (ECQ) sa Malate, Maynila.
Nakilala ang mga nadakip na sina Darrel Morales, Jose Henson, Jerico Serrano, Darrel Mejares, Joseph Steve Laguardia, Noel Orbeta, Dave Lato at Jerome Sarong.
Unang nakatanggap ng tawag ang Malate Police District o MPD Station-9 hinggil sa ilang kalalakihan na nakatambay sa Arellano Avenue kanto Zapanta Street sa Malate kung saan agad itong pinuntahan ng mga otoridad.
Pagsapit sa nasabing lugar, nakita at pinagsabihan ng mga pulis ang mga kalalakihan na umuwi na at saka ipinaalala ang mga umiiral na patakaran hinggil sa ECQ dulot na rin ng banta ng COVID-19.
Nag-uwian naman ang grupo ng kalalakihan pero pagka-alis ng mga pulis ay muling tumambay ang walo subalit hindi nila akalain na iikot lamang ang mga otoridad kung kaya’t napilitan ang mga tauhan ng Malate Police na arestuhin na lamang ito.
Pagsapit sa presinto, kaniya-kaniyang palusot ang walong nadakip kung saan nahaharap sila sa kasong Resistance and Disobedience to Person in Authority at paglabag sa ipinapairal na ECQ.
