Davao City- Kumpirmado nga dunay usa ka sundalo ang patay samtang walo sab ka mga sakop sa New People’s Army kun NPA ang nakabsan sa kinabuhi human sa natigayong engkwentro sa Brgy L.S. Sarmiento, Laak, Compostela Valley Province kaganinang alas 8 sa buntag karong adlawa. Kini ang gikumpirma ni Captain Ryan Batchar, tigpamaba sa 10th Infantry Division sa Philippine Army atol sa interbyu sa DXDC RMN Davao.
Naengkwentro sa tropa sa 25th ug 60th Infantry Batallions ang 40 ka mga rebelde nga sakop sa Southeastern Committee 3 (SECOM) ug Pulang Bagani Company 4 (PBC).
Narekober sa kasundaluhan ang unom ka high-powered firearms lakip na ang M60 machine gun ug lima ka M16 armalite rifles nga nabilin sa mga nisibat nga mga rebelde.
Sa pagkakaron, padayong nagapahigayon og hot pursuit operation ang kasundaluhan batok sa mga miikyas nga mga rebelde samtang gipatuman ang mga checkpoints sa nagkalain-laing bahin area sa 10th ID.
Kasamang Bernard Pantallon
