Total de 86 maga pasagero del un lancha que ya queda malo na mediania del mar ya puede salva el maga miembros del Philippine Coast Guard anoche.
Asegun con Alvin Dagalea del Philippine Coast Guard-Zamboanga pasada alas 8 delnoche ya puede sila recivi un llamada desde na un lancha que asegun ya quebra el parte donde connectao el propeller y taman lutao ya lang serca na Pata Island.
El incidente ya sosede na mediania del mar mientras ta viaga el lancha para na Tanduvas, Taw-Tawi.
Enseguidas tambien si Dagalea ya actua con el report y ya imbia con el BRP Malabrigo con maga personages del PCG y dayun sila ya puede salva con el 86 maga pasagero mesclao bata y de edad, hombre y mojer.
Con el maga pasagero ya lleva ensiguidas aqui na ciudad pasando na un finger wharf Baliwasan Seaside.
Y lo mismo tambien con el lancha ya gala na Baliwasan Seaside donde ay conduci pa el imbestigacion y despues tenia que manda ya compone na baradero.
Nohay el quien ya sinti duele durante el tiempo ta man lutao el lancha na mar del Pata Island.
