Sa pakighinabi sa DXDC RMN Davao sa Maco Municipal Disaster Risk Reduction and Management Office (MDRRMO), ang apektadong mga barangay mao ang San Roque, San Juan, Langgam, Poblacion, Hijo, Lumatab, Anislagan, Binuangan ug Bucana.
Gisaysay sa MDRRMO nga ang grabeng pagbaha resulta sa kusog nga pag-ulan tungod usab sa Southeast Monsoon, diin nahimong hagit usab ang pagpa-evacuate sa mga residente.
“Ang mga balay nanglutaw ilang gamit. Nangadto among kauban nga crew in the middle of the night, basa kaayo. Miabot na kay i-rescue sila pero ang nahitabo, dili sila magpa-rescue kay mupabilin gyud sila sa ilang balay. Naa ra sila sa covered court, barangay hall ug sa ilang relatives sila nag-stay,” matud sa MDRRMO personnel.
Padayon usab karon ang assessment sa Department of Social Welfare and Development (DSWD) alang sa ayuda nga iapod-apod sa apektadong mga pamilya. Adunay mga natala nga partially damaged nga balay apan gipasalamat sa lokal nga panggamhanan nga walay natala nga casualty.
Tungod sa sitwasyon, gisuspende kagahapong adlawa, September 14, 2023 ang klase ug trabaho sa teaching ug non-teaching personnel sa tanang lebel (public and private) sa shoreline barangays sa munisipalidad.
RadyoMaN Kirby Manzon
