Roxas City, Capiz – Magabaton sang pundo ang siyam ka mga barangay sa probinsya sang Capiz nagikan sa provincial government para igasto sa pagpatindog sang mga proyekto. Ginpahayag ni Capiz Gov. Antonio del Rosario nga masobra 2.3 milyon pesos ang pundo nga magakadto sa mga barangay nagikan sa 20 percent development fund sang probinsya.
Kalakip sa siyam ka mga barangay nga makabaton sang dugang nga pundo amo ang Quinat-uyan sa banwa sang Maayon; Brgy. Jagnaya kag Masgrau sang Jamindan; Agbanog kag Cabugao sang Pontevedra; Brgy. Dinginan, Roxas City; Bagacay, Panay; Salong, Tapaz kag Cabugao sa banwa sang Panit-an. Pila sa mga proyekto nga pagadulungan sang pundo amo ang pagpakay-o sang mga barangay hall, pagpasemento sang dalan, pagtukod sang multi-purpose hall kag iban pa.
May kaangtanan sini, ginpatigayon sa talatapan sang gobernador sang nagligad nga adlaw sang Martes, Setyembre 5, 2017, ang pagpyermahanay sang memorandum of agreement sa tunga sang siyam ka mga kapitan kag sang gobyerno probinsyal sa pagpanguna ni ni Gov. del Rosario. Ginpasiguro man sang gobernador nga pagagastuhon ang nasambit nga kwarta agud mapuslan sang mga pumuluyo sa probinsya sang Capiz.
(c) Capiz Aksyon News Center
