Sa pagpanhingusog nan kadumayahan sa tyangihan sa syudad na sakto sa timbang an napalit nan mga mamalitay ,gihimo an isa ka sorpresa na pag inspection sa mga timbangan sa mga negosyante suyod sa tyanggi para mahibaw an kon sakto ba gajud ini sanan kon sinsero ba sa ila pagpamaligya na way kuyang o limbong. Sa paglibot sa inspection nan mga personahi nan kadumayahan sa merkado publiko kuman bag o,nakumpiska an 9 ka mga timbangan gikan sa namaligya nan isda,an iban isab gikan sa gulayan ,bugasan og karnehan. Sumaya pa ni Mr. Toto Sario,an Maintenance Staff sa City Public Market na ila gikumpiska dajon an nakit an na timbangan na may mga deperensya labina an way silyo sanan kuyang sa timbang.Multahan nan tag P250 an tag ija nan timbangan adecer pa mabalik sa ila an amu na timbangan . Tag awhag isab kuman nan kadumayahan sa merkado publiko an mga konsumante na itimbang pag utro an ila mga pinalit sa “Timbangan ng Bayan” na jaun gipahimutang sa entrance na bahin sa tyanggi labina kon sila nagduda na ini kuyang sa timbang para madali dajon pag aksyon an reklamo.(RadyoMaN Jerson Fuentes)
