Nihilak na ang usa ka inahan sa dihang na-interview sa dxCC-RMN Cagayan de Oro karong buntag bahin sa pagkawala sa iyang nuybe anyos nga bata.
Matud ni Hazel Salvalion, 39 anyos, inahan sa nawalang bata nga si Rafael Arnold Salvalion nga niadto pang Miyerkules sa udto na missing ang iyang anak.
Gibutyag sa inahan nga nigawas lang atol sa lunch break ang iyang anak aron mopalit og tubig apan wala na makabalik sa ilang Grade 2 classroom sa East City Central School, Barangay Lapasan ning syudad.
Uban ni Rafael Arnold Savalion ang iyang classmate nga si Ritch Nicer Labitad, otso anyos sa dihang nigawas sa classroom ug wala na makabalik.
Hangtud karon wala pa nakauli ang duha ka mga menor de edad nga gikabalaka sa mga ginikanan.
Naghangyo ang mga ginikanan nga kung dunay nakakita sa ilang mga anak pwedeng motawag sa cellphone number ni Hazel Salvalion nga 09355985440.
Gidugang sa inahan nga nakauniporme pa ang duha ka mga bata sa dihang nawala niadtong Miyerkules, Nobyembre 28 ning tuiga.
