TACLOBAN CITY – Nagkukulang hin supply han bugas an Pilipinas ngan nag-aantos kita hin mahal nga presyo han commercial rice ha mercado pero yana an nakumpiska nga 982 ka-sako hin bugas in plano nala nga iglubong han Bureau of Customs.
Ha interview han RMN kan Diogenes Cenita, Acting Deputy District Collector han Bureau of Customs Tacloban, diri na pwede pangaunon ngan tuunon ini nga nasabi nga mga bugas kay mabaho na ngan malain na an itsura.
“Nagkaroon ng damage din, siguro pag may bagyo nabasa sya. Pinuntahan namin sa bodega pero damages na, pinakuhanan namin ng laboratory pero unfit na sya for human consumption bisan ha mga hayop.”
Nanhihingarag man liwat an Customs hini nga mga sako-sako han bugas pero waray na hira mahihimo kay diri na ini pwede panga-unon.
Nakumpiska ini han Customs dida pa han tuig 2013 tungod han kakulangan han importation permit han consignee nga waray na ngarani han opisyal.
Maiha na ini nga gin-inistandby ha NFA warehouse tungod nga nagpatawag daw an Customs hin auction pero waray may nagbid.
4 ka-tuig ini nga sako-sako han bugas nga igin-inukoy ha NFA warehouse nga yana lugod in diri na pwede magamitan o makaon.
Nangaro na hin bulig an Customs Tacloban ha Office of the City Mayor nga bilngan hira hin tuna nga pwede nira ini iglubong.
Pero waray pa reply an Mayor’s Office hini nga hangyo han Bureau of Customs.
