Gihagit ni South Cotabato Federation of Association of Barangay Chairman ug Sangguniang Panlalawigan Ex-Officio Member Rolando Malabuyoc ang mga barangay opisyal sa probinsya nga maggahin ug bisag lima lang ka minuto matag adlaw aron sa pagpahigayon ug “operation kulob” kon pagpanghinlu sa mga lugar kon butang nga pwede puy-an sa lamok nga nagdala ug balatian nga dengue.
Matud ni Malabuyoc nga gawas sa COVID-19 dapat nga tutukan usab sa barangay ang makamamatay nga dengue.
Gipahayag ni Board Member Malabuyoc nga napamatud-an na sa 2019 dengue outbreak sa South Cotabato nga epektibo sa pagpaubos sa dengue cases ang “search and destroy.”
Gikumperma usab sa opisyal nga magpasar ug resolution ang Sangguniang Panlalawigan nga naghagit sa mga munisipyo/syudad ug barangay sa pagpatuman sa enhanced 4s sa pagpuo sa dengue nga mao ang pagpanghinlu ug pagguba sa mga gipuy-an sa lamok, protektahan ang kaugalingon batok lamok ug gilayon nga magpakonsulta kon may sintomas sa dengue ug suportahan ang fogging kon spraying higayon nga may dengue outbreak.
