Davao City – Walay lama sa kamatooran ang mibaniog nga taho nga adunay pagpangdakit nahitabo sa area sa Tigatto sa distrito sa Buhangin nahitabo matud pa niadtong Biyernes sa gabii.
Kini ang gikumpirma ni Chief Inspector Jack Tilcag, hepe sa Buhangin PNP, human sa makuti nga pagsubay sa giingong pagdagit sa usa ka babaye sa tigatto niadtong Biyernes sa gabii.
Matud ni Tilcag nga mismo ang giingong babaye nga wala na nganli ang nagbutyag nga wala kini madagit sa puti nga van.
Gikan matud pa nagkobra sa Pantawid Pamilyang Pilipino Program (4Ps) financial assistance ang babaye ug dayon misakay og motor gikan Milan ug nagpahatud sa ilang pinuy-anan sa nasangpit nga lugar.
Base sa unang impormasyon naplatan ang motor nga gisakyan sa ginang una muabot sa HB1 sa Tigatto ug usa ka puti nga van ang kalit mihunong ug pugsanon gipasakay ang babaye.
Apan dihang gisusi ang CCTV camera nga nakamuntar sa dapit walay nakitang motor nga daot ug walay babaye nga gipasakay sa puti nga van.
Busa nagduda si Tilcag nga ang mga paryente ra sa babaye ang nagpakata’g sa istorya nga nag-viral sa social media sa miagi nga adlaw.
RadyoMaN Joel Viray
