Davao City – Usa ka matang sa pag-atake sa balaod sa nasud ang sunod-sunod nga pagpamusil sa mga sakop sa Integrated Bar of the Philippines Davao Chapter.
Suma ni Ateneo De Davao University Law Professor Atty.Arnold Abejaron nga ang pagpangatake sa hut-ong sa mga abogado walay kalainan sa pag-atake sab sa balaod isip sila ang legal officer sa Pilipinas.
Kahinumduman, unang gipusil patay si Attorney Connie Villamor sa Tagum City alas 8:00 sa buntag sa miagi nga adlaw samtang mupaingon na unta kini sa ComVal sakay sa iyang SUV.
Ug karon lang buntag, lain na usab nga abogado nga si Attorney Wilmer Donasco ang gipusil sa riding-in -tandem samtang nagparking sa iyang sakyanan sa Candelaria St. Ecoland duol lang sa Hall of Justice.
Hinuon wala maigo ang biktima apan nasamdan kini gumikan sa mga buak sa salamin nga miigo ngadto kaniya busa daling gidala sa ospital si Donasco.
Gipamugos ni Abejaron, angay masabtan sa matag indibidwal nga ang mga abogado igo ra nagtrabaho ug nagtuman sa gipanumpaan nilang propesyon sa walay pagpihig kung kinsa ang labanan.
Wala kapugngi ni Abejaron nga mupabuhagay sa iyang kabalaka tungod sa sagunson nga pagpamusil sa riding-in-tandem ngadto sa iyang mga kaubanan sa trabaho.
RadyoMaN Joel Viray
