Davao City – Makasulti na karon ni Digos City School Division member Juvy Salise nga mas miimprobar pa ang abilidad sa ilang mga atleta sa natad sa paugnat sa kusog itandi sa nangligad nga katuigan.
Matud ni Salise, nag-uswag na ang abilidad sa ilang mga atleta tungod sa mga programa sa Department of Education 11 (DepEd-XI) ug sa Digos City School Division ikumpara sa miaging panahon.
Busa gipanghambog ni Salise nga lig-on na karon nga pambato ang ilang mga atleta aron mas paangaton pa ang ilang puwesto gikan sa third rank sa miaging tuig sa DAVRAA 2018 karon.
Segun ni Salise, kung milambo man ang kapasidad sa ilang mga atleta kana tungod kay ila una gidisiplina ug gibansay ang ilang mga coaches sa nagkada-iya nga matang sa isports.
Gani una paman sila hingpit mibiyahe paingon dinhi sa dakbayan, usa ka semana gibansay ang ilang mga atleta dili lang sa lumba sa dagan apan bisan pa ubang isports nga ilang gidugang karon.
Gibatbat pa ni Salise nga nakaarangkada og maayo sa praktis ang ilang mga atleta ug mga coaches gumikan sa suporta nga gihatag sa lokal nga kagamhanan ngadto sa Digos City School Division.
Kung magmugna lang og konkreto nga mga programa sa isports ang mga tulonghaan mas daghan pa nga mga estudyante madiskubrehan nga mas mahimo pang abilidaran nga atleta.
Kun walay himoong lakang ang mga School Divisions palibot sa rehiyon dili gayod makaplagan ang nagpahipi nga mga estudyante nga dunay dugo sa atleta ug potential nga pambato sa sports events.
Mao bisan og lambo na ang abilidad sa mga atleta sa Digos City karon apan wala maghunong sa pagpatuman og sports development program ang Digos City School Division aron makadiskubre pa og bag-ong talentado nga atleta ang ilang dakbayan, dugang pagbatbat ni Salise.
RadyoMaN Joel Viray
