Nakit-an na ang abogada nga si Atty. Sarah Cabrera Calipayan human wala mopa-uli sa ilang panimay sukad kagabii.
Si Atty. Calipayan nakit-an nga naglakaw sa vicinity sa Banilad Town Center pasado alas 11:00 na kaganihang buntag.
Gihulagway ni Major Maria Teresa Macatangay ang hepe sa Fuente Police Station si Atty. Calipayan nga gikapoy ug naka-inom.
Sa inisyal nga imbestigasyon ni Macatangay , si Atty. Calipayan nagpalabay diay sa kagabhion sulod sa usa ka hotel nga duol ra sa Banilad Town Center human maka-inom ug nahubog.
Sa sayo nga interview matud sa bana ni Atty. Calipayan nga si Atty. Jamaal James Calipayan, nga naguol ang iyang asawa ug nakasulti pa kaniya sa wala pa nahitabo ang insidente nga dili na ganahan motrabaho ang iyang asawa .
Sa nasayran si Atty. Sarah usa ka corporate lawyer sa Filinvest Company, ug gani matud sa bana niini nga bag-ohay lang ni resign ang abogada tungod sa pressure sa trabaho.
Gibutyag ni Major Macatangay nga gi-isip nila nga sirado na ang imbistigasyon sa kaso ,human masuta sa kapolisan nga naguol ug na-depress si Atty. Sarah busa kini naghubog.
Ang bana ni Atty. Sarah Calipayan nga si Atty. Jamaal , nihangyo na og privacy sa maong insidenti ug niapilar sa publiko nga sabton ang sitwasyon sa iyang asawa.
Nangayo usab og pasaylo si Atty. Jamaal sa inconvenience nga iyang nahimo nga alang kaniya makatarunganon lang isip usa ka bana taliwa sa kondisyon sa iyang asawa.
