MANSILINGAN, BACOLOD CITY — Ginabulubanta P2 million nga balor sang alahas ang ginkawat sang indi pa makilal-an nga mga persona sa balay sang isa ka babaye nga abogada sa isa ka residential village sa Barangay Mandalagan, Bacolod City sadtong Sabado, November 4.
Suno kay Senior Inspector Jun Ray Batadlan, head sang Police Station 3, ginaka sang mga kawatan ang perimeter fence sang balay kag nagsulod pinaagi sa bintana sang child’s bathroom nga yara sa ikaduha nga panalgan.
Nagderetso ang mga kawatan sa kwarto sang abogada kag ginguba ang iya kabinet, kun sa diin nahamtang ang iya mga jewelry items kaangay sang singsing, earings, necklaces, wrist watches kag iban pa.
Dugang pa ni Batadlan, wala sa balay ang abogada sang natabo ang insidente.
Nadiskubrehan na lang sini ang pagpangawat mga las-10:45 na sa gab-i.
Suno pa kay Batadlan, posible nga inside job ang natabo bangud kahibalo ang kawatan kun diin nahamtang ang mga alahas.
Dugang pa niya nga posible nga apat ang mga naghimo sang krimen.
Padayon sa karon ang imbestigasyon sang kapulisan tuhoy sa insidente.
——————–
Like our official Facebook page: www.facebook.com/ifmbacolod943
