Polanco, Zamboanga del Norte – Nakahiagom og daghang samad pinusilan hinungdan sa pagkamatay sa usa ka abogado human girakrakan og bala sa duha ka wala mailhing mga mamumuno kaganiha alas 12:40 takna sa kaudtohon didto sa purok Ipil-ipil, Brgy. Labrador, lungsod sa Polanco Zamboanga del Norte.
Biktima giila sa kapolisan nga si Atty. Eyahiya Salip Ahmad Malon, 79 anyos, minyo, negosyante, lumolupyo sa Barangay Turno ning dakbayan sa Dipolog, kinsa dunay dakong luna sa dapit hitaboan.
Sumala sa report nga nahipos gikan sa Polanco Municipal Police Station nasayran nga ang Biktima uban sa iyang empleyado nga si Victor Abubutal 25 anyos, molupyo sa Brgy. Villahermosa sakop sa susamang lungsod, niduaw kini didto sa gipanag-iyahan luna sakay sa Nissan Navara kolor itom plaka numbero PXI 452.
Ang kauban empleyado nga si Victor, nikanaug aron sa pagpanlapas ug ang biktima nagbaking sa gimaneho nga sakyanan, parking sa daplin sa dalan aron unta matulog.
Apan kalit lang nibutho ang duha ka wala mailhing tawo nakabunit ang mga nawong dunay gilay-ong 30 metros ug namusil sa biktima gamit ang tag-as nga matang sa armas, tiro sa makadaghang higayon hinungdan sa hinanaling niining kamatayon.
Daling misibat ang wala mailhing mga mamumuno sakay sa single motor xrm kolor itom way plaka padulong sa wala masayring lugar.
Ang kauban si Victor daling niadto sa nahimutangan sa biktima, iyang nasuta nga naligo na sa kaugalingon dugo wa nay kinabuhi.
Ang Provincial Crime Laboratory Office sa pagpanguna ni PI Ruben Sarita, (SOCO) nakarekober sa dapit hitaboan og 11 ka basiyo sa 5.56 mm nga bala.
Samtang padayong ginaimbestigahan sa kapolisan sa Polanco ang motibo sa natigayong insidente.
Sa karon ang patay lawas sa biktima gidala na sa iyang pamilya sa lungsod sa Salug alang sa ipahigayon lubong subay na sa tradition sa tinuhoan Islam.
