Davao City – Mitubag na ang ang abogado nga giakusahang nanumbag sa mga myembro sa fire dance troup tungod kay napiksan og kalayo atol sa fire dance show sa Philippine Science High School sa Brgy. Sto Nino Tugbok, Davao City.
Sa tulumanong Kuskos Batikos sa RMN DXDC Davao, gipaabot ni Atty. Butch Delos Reyes ang iyang pagpangayo og dispensa sa nahitabo tungod kay wala niya kapugngi ang iyang kaugalingon human mapaso sa kalayo gikan sa mga props sa fire show.
Pinaagi sa Kuskos Batikos, iyang gihangyo ang mga complainant nga gipanguluhan ni Cristopher Marante og usa ka dayalogo aron iyang ikapaabot ang sinserong pagpangayo og pasaylo sa nahitabo.
Gidugang ni Atty. Delos Reyes nga labihan ang iyang gibating kabalaka human midulot ang baga sa iyang panit tungod kay taas ang iyang sugar level rason nga naglikay kini nga masamad ang iyang kalawasan.
Karong adlawa gikatakda nga mupatim-aw sa Tugbok PNP si Atty. Delos Reyes aron iyang ikapadayag ang iyang bahin sa maong insidente diin didto mireklamo ang lima ka mga lalakeng dancers.
RadyoMaN Erin Lumosbog
