Davao City – Nipatala sa Tugbok Police ang grupo sa mga fire dancer tungod kay gipangsumbag sa usa ka abogado.
Sa blotter sa Tugbok PNP, mireklamo sila si Christopher Rey Marante, 24 anyos, residente sa Bayanihan Toril Davao City, Edwin Macian, Neil Camocho, Louie Param, Darious Rubio ug Leo Alimasag human gipanumbag sa akusadong si Atty. Butch Delos Reyes sulod sa Philippine Science High School alas 11:00 ang takna sa kagabhion.
Gibutyag sa mga complainant nga samtang nagpractice og fire dance napiksan og baga si Atty. Delos Reyes rason nga nasuko ang akusado nga miresulta sa pagpamumbag.
Gidugang sa mga biktima nga sa wala pa nila sugdi ang ilang performance ila nang gipasidan-an ang mga tawo nga anaa sa palibot nga mudistansya aron dili mapiksan sa baga sa kalayo apan wala tuyoa nga napiksan ang akusadong abogado.
Gitambagan ang mga biktima nga magpatambal sa Southern Philippines Medical Center (SPMC) ug ipadayon ang ilang reklamo sa barangay.
RadyoMaN Erin Lumosbog
