Gideklarar nga patay na sa iyang attending doctor sa Chong Hua Hospital sa Mandaue City si Atty. Jonah John Ungab, alas 2:00 karong hapon. Kini ang gikompermar ni Supt. Artemio Ricabo, spokesperson sa Cebu City Police Office . Si Atty. Ungab gikan nitambong sa court hearing sa kaso ni Espinosa kaganihang buntag diin kini gikonbikto sa kalapasan sa Gun Ban, apan na abswelto sa kasong Illegal Possession of Firearms nga iyang giatubang niadtong 2010. Si Espinosa gi escortan sa mga personnel sa National Bureau of Investigation kon NBI-7 sa pagtambong niini sa promulgation sa iyang kaso. Samtang si Ungab nagpabilin pa sa korte tungod sa iyang lain pang kaso. Apan samtang mobiya na si Atty . Ungab sa Quimonda Bldg. sakay sa iyang Suzuki Ciaz kauban ang iyang asawa, gi-ambush kini sa riding in tandem nga mga mamumuno. Luwas ra hinoon ang iyang asawa nga si Atty. Pearl Ungab. Nakamaneho pa si Atty. Ungab gikan sa Quimonda Bldg. paingun sa atubangan sa Sugbutel ,apan danag nalang ang pagka parking sa sakyanan. Sa imbestigasyon sa kapolisan naigo sa ulo ug tangkago si Atty. Ungab nga maoy hinungdan sa iyang kamatayon. Si Atty. Ungab nagsilbi usab nga Bise Mayor sa Lungsod sa Ronda.
Samtang ang Presidente sa Integrated Bar of the Philippines kon IBP Cebu City Chapter Atty. Glenn Capanas, nikondenar sa pagpusil patay kang Atty. Ungab ug niawhag sa mga otoridad nga sulbaron ang kamatayon sa abogado ug dakpon ang mga kriminal.
