Usa sa mga pagsulay sa buhay-abroad mao ang kamingaw tungod sa kalayo sa imung mga minahal sa kinabuhi.
Kini ang giingon ni Ray Floyd Santander, 23 anyos, taga san Miguel Matina ning syudad sa Davao, upat na ka tuig nanarbaho isip usa ka seafarer o mas naila sa ginatawag nga seaman.
Sa pakighinabi sa DXDC RMN Davao kaniya, gisaysay niya ang mga pagsulay nga iyang naagian sa dihang on-board kini sa barko.
Sumala ni Ray Floyd, upat ka tuig ng milabay sa dihang nagsugod siya og trabaho ug kadto usab nga panahon ang unang higayon nga nalayo siya sa iyang pamilya og pila ka bulan.
Gani iya usab gipasabot ang kabahin sa ilang income isip usa ka mamumuo nga naka-base sa kadagatan.
“Tinuod nga dako og income ang seaman kay wala man gud mi ginagastuhan sa sulod sa barko, pero ang kwarta dili man pud namo ginapunit didto. Makabawi lang mi sa among pamilya og gasto pagbaba namo, pasalamat namo nga nahuman mi sa among kontrata nga nagatrabaho sa barko”, sigun ni Ray Floyd.
Usa lang si Rayfloyd sa libuan ka mga OFWs nga nanimpalad aron makatabang sa ilang pamilya ug nagsakripisyo aron makalingkawas sa kalisod.
Bisan mapa-landbase o seabase man, lahi-lahing pagsulay ang nasugata sa mga tawo diha sa ilang pagpanarbaho apan sa mga higayong muhapak ang mga problema nga daw murag kakusgon sa balud, mas nagapaduol si Rayfloyd sa Ginoo.
Dakong usab ang pasalamat niya ngadto sa Ginoo sa proteksyon ug giya nga gihatag sa iyaha lakip sa iyang pamilya bisan pa man sa pagsulay nga iyang mga nasaguta, nagpabilin ang iyang lig-on nga pagtuo kang Hesu Kristo.
Matud niya nga bisan wala silay church service o fellowship sulod sa barko, kanunay ang iyang komunikasyon diha sa Ginoo gani og makababa na siya, ginasiguro niya nga makasimba kauban ang iyang pamilya.
Ginalauman karon ni Ray Floyd nga makasugakod sa propesyon nga iyang gipili ug nanghinaut siya alang ngadto sa mga millennials ug ubang OFWs nga adunay ginaagiang kalisod sa pagpanarbaho nga unta makalahutay uban ang grasya, gugma ug maayong relasyon diha sa kahitas-an.
RadyoMaN Renz Barbarona
