Gin-absuwelto sang Sandiganbayan First Division si anay Sara Mayor Neptali Salcedo kag pito pa ka iban sa kaso nga paglapas sa anti-graft and corrupt practices act ukon R.A. 3019.
Sa 62 ka panid nga desisyon sang Sandiganbayan, ginpahayag nga napaslawan ang prosecution nga pamatud-an ang akusasyon batuk kay Salcedo kag sa iban pa nga akusado nga sanday Edna Pacrim, Roel Salcedo, Calixto Olivares, Gregorio Golingay, Marcelino Abellar, Marilou Balasabas kag Elizabeth Tan.
Ginpasaka ang nasambit nga kaso sang 2011 kag sang Enero 12, 2018 lamang ginhiwat ang promulgasyon.
Angut sini, ginpahayag ni Atty. James Balsomo, abogado sang mga akusado nga daku nga bagay nga na-acquit ang iya mga kliyente agud makuha sang mga ini ang ila retirement benefits.
nahibaluan nga sa mga co-accused ni salcedo, isa na lamang ang naga-trabaho pa sa munisipyo samtang ang iban nagretiro na kag patay na ang duha.
