Abu embuelto na faliao kidnapping del hermano del vice mayor, arestao enante aga

El combinao fuersa del pulis y militar ya confisca rifle grenade y alegao Improvised Explosive Device desde con el un miembro del Abu Saffay Group quien embuelto na faliao kidnapping conel hermano del vice alcalde del año 2015.
El operacion ya conduci el maga pulis y militar contra con el suspechao enante aga na barrio de Baliwasan particular in Manggal Drive.
Con el suspechao ya nombra como si Mansul Radalan alias Bentong, 37 año de edad.
El maga otoridad ya anda na residencia di Radalan cargando el un search warrant desde na corte por el caso de illegal possession of explosive.
Durante el mencionao operacion, maga otoridad ya recobri un rifle grenade y un alegao IED na casa di Radalan.
Si Radalan reportaomente embuelto na Sipadan kidnapping del año 2001 y el faliao kidnapping di Dr. Armando Ituralde del 2015 na Talon-Talon.
Si Radalan taqui na ciudad y estudia para man kidnap con un Korean national quien tiene negocio aqui na ciudad.
Si Radalan detenido ya ahora na estacion de pulicia.

Facebook Comments