Davao City – Gibalhin na og detention facility ang duha ka mga gituohang sakop sa Abu Sayyaf Group nga nasikop sa mga awtoridad sa may Purok 4, Upper Ilang Brgy Ilang, Davao City
Sa interbyu sa RMN Davao kang Bunawan PNP station commander Police Major Noel Villahermosa nga gikonsidera nila ang duha nga mga high risk detainees nga sila Haider Arasani Anjawang ug Al Faisal Abubakar Hassan.
Hingpit na usab giduso ngadto sa piskalya ang kasong kasong may paglapas sa RA 10591 ug RA 9516 batok sa mga suspek human sila makuhai’g baril ug eksplosibo atol sa joint operation sa mga awtoridad sa Davao.
Sumala ni Villahermosa nga aduna usab giatubang nga kasong Frustrated Murder ang suspek nga si Adjawang busa gipahibalo na ang Regional Trial Court Branch 51, Puerto Princesa City, Palawan nga nihawid usab sa kaso niini.
Samtang, gihimakak sa mga dinakpan nga sakop sila sa ASG ug dili usab kanila ang mga nakuha nga pusil ug eksplosibo.
Apan gibutyag ni Villahermosa nga ang Intelligence units mismo ang nikumpirma nga mga Abu Sayyaf ang mga nasikop nga mga suspek.
RadyMaN Aimee Guinita
