Ya confirma el hefe del Task Force Zamboanga Col. Leonel Nicolas cay ta continua sila man-monitor el presencia del mga cuantos myembros del Urban Terrorist Group (UTG) del mga bandido Abu Sayyaf quien taqui na ciudad y ta observa el situaccion del fueblo.
Asegun con Nicolas, hinde sila ta nega y confirma el presencia de estos, sin embargo, chene indicaccion cay taqui lang esos tan bira-bira cay chene ya cuantos uban diila el ya fuede aresta el otoridad.
Base na intelligence reports del militar, chene de esos el taqui lang ta esconde y ta determina pa sila si cosa el verdad motive de esos.
Presentamente, ta agara copya el militar con cuantos diila que chene mandamiento de aresto para en tiempo fuede columbra canila el otoridad, fuede dayun canila aresta y pone na calaboso.
Notable que mejorao aura el seguridad ta implementa el military, junto con el policia na cuantos mga lugar donde ta conduci el actividades del Zamboanga Hermosa Festival 2017. – *Bhong Simbajon/RMN News*
