Davao City – Temporaryong gisirado alang sa mga bikers ug mga motorista ang Acacia-Mandug Bypass road human sa nahitabong landslide sa lugar kagahapong adlawa (Marso 23, 2021) nga gikamatay sa usa ka biker nga nailing si Harvey Mar Cipriano Panes, taga Trento, Agusan del Sur human kini natabunan ug na-retrieved sa mga rescuer.
Sa interbyu sa DXDC RMN Davao kang Barangay Kapitan Rey Utotan sa Mandug, gisaysay niini nga aron dili masubli ang insidente ug samtang padayon pa ang konstruksyon o proyekto sa lugar, pasirad-an una ang maong Bypass road gikan Mandug padulong sa Indangan ug Acacia ning dakbayan.
“Hangyo gyud nako sa katawhan nga for the meantime akoa ‘ning padak-an, dili ko ni paagian ni para for safety measures gyud atong buhaton ani. Advise lang nako ang naga construct diri, i-advise nato nga padak-an ang both ends (sa dalan) diri sa Mandug ug padulong gyud on going sa Indangan ug Acacia,” segun sa opisyal.
Samtang, nakumpirma usab nga luwas ang duha pa ka motorista nga gituohang natabunan human kini mipatim-aw alas pasado alas-3 sa hapon ug misaysay sa otoridad nga nakalusot na sila sa dalan ayha nahitabo ang pagdihili sa yuta.
Gipangunahan sa Urban Search & Rescue Unit sa Central 911 ug City Disaster Risk Reduction and Management Office (CDRRMO) ang retrieval operation sa area asa nahitabo ang landslide.
RadyoMaN Kirby Manzon
