President Roxas, Capiz- Pilason ang tatlo ka tuig nga bata nga lalaki makaligad nalukpan sang armasluthang alas 9 sang aga sa Brgy. Manoling President Roxas, Capiz.
Suno sa imbestigasyon sang mga kapulisan, ginkuha kag ginhampangan sang biktima ang .38 caliber pistol nga armasluthang nga ginapanag-iyahan sang amay sini nga si Rolando Garcia y Dumali, 52-anyos. Ini ang nakit-an sang iya iloy nga si Maria Leny Garcia y Placer,28-anyos gani nga iya gin-agaw ang armas sa iya anak apang dimalas nga ini ang naglupok.
Nag-angkon sang pilas sa nawong ang biktima nga naglapos sa natuo sini nga liog.
Madasig naman nga nagresponder ang mga katapo sang Active Lutod-lutod Emergency Response Team(ALERT) kag gindala sa ospital ang biktima.
Sa subong yara na sa stable nga kondisyon ang tatlo ka tuig nga bata nga ginabulong sa Roxas Memorial Provincial Hospital.
photo © Active Lutod-lutod Emergency Response Team- ALERT
