Ta manda aura imbestiga el govierno local con el Departamento de Educacion asercael muerte del un Grade 7 estudiante del Don Pablo Lorenzo Memorial High School que ya man ipit na ring de basketball adentro mismo del diila gym del otro dia.
Asegun con el official encargao del ciudad Cesare Iturralde, necesita el DepEd aparece con el mas ondo imbestigacion na soceso en-cooperacion con el policia de Sta. Maria para fuede determina el culpabilidad del administracion del escuela y determina si chene ba neglehencia si porque ya socede el accidente.
Si ta acorda, si Greyshen Kurt Balanto y Ibañez, 12, de Cabatangan ya muri cuando ya cay conele insima el board del basketball adentro na DPLMHS gym del otro dia. El su compañero si Mark Gutierrez y Remitch Remegio ya sustene tambien cuantos irida na cuerpo causa del accidente. Sila mismo el ga grita para dale warning con Balanto cuando ta tumba ya asegun el ring, sin embargo, nuay este fuede uwi canil cay de headset el victima rason para man ipit ele na mismo goal de basketball. – Bhong Simbajon/RMN News
