Davao City – Aduna nay gitudlong suspek nga mipatay kang Rachelle Panio sulod sa iyang kwarto sa ilang balay sa Purok 12, Barangay 76-A Bucana, Davao City.
Sa interview sa DXDC RMN Davao kang Rodrigo Panio, amahan ni Rachel, miingon kini nga ang iyang boarder nga ila ra usab silingan ang gitudlong suspek nga mipatay sa iyang anak kinsa aduna usab kasong pagpatay didto sa Manila.
Gisaysay pa ni Rodrigo nga wala kini nagdahom nga mabuhat kini sa iyang boarder nga unom na ka tuig nga nagpuyo sa iyang gipanagiyahan nga boarding house.
“Wala gyod ko magdahom kay syempre hilumon lagi unya maayo kaayo mutagad pagkahuman duna man diay dakong sala didto sa ilaha diay, nakapatay man diay na” matod niini.
Miingon sab ang iyang amahan nga adunay posibilidad nga gikawatan og kwarta si Rachelle nga mokantidad og 60,000 pesos nga pang bayad unta niini sa iyang board examination.
“Saisenta mil man to. Mitug-an man to iyang classmate nga nakadaog siya sa 4Ps ug napilian ang iyang pangalan” dugang ni Rodrigo.
Si Rachelle maoy kinamaguwangan nga anak ni Rodrigo ug gihulagway niya kini nga buotan ug kugihan gani misaad kini nga siya ang magpaskwela sa iyang mga igsuon inig makakita na og trabaho.
Panghinaot pa ni Rodrigo nga mahibalik na ang death penalty aron kung madakpan na ang suspek nga mipatay sa iyang anak masilotan kini og kamatayon.
