Acosta: Safety officers needed

36

Davao City – Gi-aghat karon ni First District Councilor Ma. Belen Sunga-Acosta ang tigdumala sa mga pampubliko ug pribadong tulonghaan nga magbutang gayud og safety officers aron dili masubli ang kaguliyang sa mga estudyante tungod lamang sa linog ingon man hulga sa kinabuhi.

Matud ni Acosta, angayan lamang nga pahugtan ang seguridad sa tibuok premises sa mga tulonghaan ug istriktong ipatuman ang pagkapkap kun ‘bag frisking’ sa tanang mga estudyante aron walay mga hinagiban nga makasulod sa eskwelahan.


Gikinahanglan usab palig-onon ang guidance counseling sa mga tulonghaan ug bansayon ang mga magtutudlo sa counseling kun hustong pagmaymay sa mga tinun-an aron adunay hinanaling intervention nga mapatuman alang sa mga sitwasyon diin adunay mga mang-bully or mabiktima sa bullying, sumala pa sa re-elected lady councilor.

Matud ni Acosta, makonsidera nga ‘isolated case’ lamang ang pag-panic sa mga estudyante sa may Crossing Bayabas National High School sa Toril human ang natigayong aftershock ug ang pagbitbit ug kutsilyo sa usa ka estudyante sulod mismo sa Soledad National High School sa Baliok Talomo District ning siyudad nga parehong nahitabo karon lamang nga semana.

Dugang ni Acosta, ang insidenteng pag-collapse sa 13 ka mga estudyante sa Baliok matawag nga usaka natural reaction kadto sa ilang nakitang hinagiban nga gidala sa usa ka estudyante kinsa gikatahong biktima diay sa bullying.

RadyoMaN Joel Viray

Facebook Comments