Davao City – Gidasig ni Davao City Councilor Mabel Sunga-Acosta ang publiko nga magpakabana ug kanunay makig-alayon sa mga tinugyanan sa balaud ug sa kasundalohan ugaling adunay mamatikdang kadudahang tawo sa palibot.
Matud ni Acosta nga makawang lamang ang mga paningkamot sa kapulisan ug sa Task Force Davao ug maingon man sa militar kung magkumpiyansa ang katawhan ug dili sila makig-alayon kanila diin daku unya ang posibilidad nga malutsan gayod sa mga terorista ang siyudad sa Dabaw.
Mabatukan lamang ang pag-atake sa mga teroristang grupo kung ang matag usa dili magpasagad apan magpakabana sa ilang dapit ug labaw nang adunay mga bag-ong mga nawong sa ilang dapit, sumala ni Acosta.
Gihagit ni Acosta ang mga Dabawenyo nga salig kanunay sa mga kapulisan ug sa Task Force Davao sanglit ang mga terorista lihok ra sa mga otoridad ang ilang bantayan ug kung makabinta dinha na sila mangatake ug mamomba sa usa ka lugar sama sa nahitabo sa Jolo Cathedral.
Dugang pa sa konsehala nga bisan og hitsas sa modernong kagamitan ang mga tinugyanan sa balaud ug ang Task Force Davao sa dakbayan apan kulang gihapon kini busa gikinahanglan ang kooperasyon sa publiko aron batukan ang terorismong plano sa mga dautang elemento.
Kay bisan gani ang mga gamhanang nasud sama sa Pransiya, Amerika, ug uban pa kinsa kumpleto sa modernong pang alkontra sa terorismo malutsan pa man gani sa mga terorista unsa na lang kaha ang Pilipinas nga wala ra sa kumingking sa ilang tekonolohiya ug bag-ong kagamitan.
Andam si Acosta sa pagmugna og mga ordinansa nga makatabang sa pagpalig-on sa siguridad sa dabaw kung magsugyot ang kapulisan ug sa task force davao ngadto sa iyang kumitiba sa kalinaw.
Giluwat ang pamahayag ni Acosta nga tungod sa pagbusikad sa duha ka bomba sa sulod ug gawas sa cathedral diin sagad sa mga namatay nangaputol ang ilang mga kalawasan.
RadyoMaN Joel Viray
