ACT: Academic freeze gi-uyonan

34

Davao City – Dismayado ang Alliance of Concerned Teachers kang Department of Education Undersecretary Annalyn Sevilla kay hangtud karon wala pa gihapon mugawas ang gisaad nga P9-B nga pondo alang sa pagsuporta sa modular modality nga gamiton sa pag-abli sa klase sa Oktobre 5, 2020.

Gibutyag ni ACT Davao City Chapter President Reynaldo Pardillo nga dunay pipila ka labaw ang nagproblema na karon sa ilang Model of Excellence ug ang gilauman mao ang maong pondo aron mapalit ang mga gikinahanglan alang sa pag-abli sa klase karong tuiga.

Ang P9-B nga pondo nga gisaad ni Sevilla mao unta’y tubag sa pagkunhod karon sa pondo nga nasinati karon sa mga tulonghaan apan hangtud karon wala pa gihapon kini naapod-apod ang maong suporta pinansiyal sa mga tulonghaan.

Segun ni Pardillo nga kon dili pa gayod kaya mas maayo mag-education freeze na lang karong tuiga hangtod dili masulbad ang mga problema nga nagtumaw karon sama sa modules, health protocol, internet access nga kung ang sa pribadong tulonghaan naglisod sa internet samot na sa kabataan nga anaa sa mga squatter areas ug sa kabukiran nagpuyo.

Kung ang usa ka tuig dili pa igo aron mahatag ang competent learning nga gikinahanglan sa mga estud-yante labaw na ang lima ka buwan sa pag-eskwela sa mga kabataan ug kini bug-at na kini nga basihan aron ikunsidera ang panawagan nga academic freeze.

Ang usa ka tuig nga pag-undang sa klase dili makaapekto sa mga kabataan sanglit ang edukasyon makapaabot kini apan ang kinabuhi sa bata kung magkasakit og COVID-19 posibleng makutlo gayod kini ug nga matakdan na hinoon ang mga ginikanan, mga magtutudlo, ug posibleng ma-lockdown pa ang mga eskwelahan.

“Nganong ato man gyod ipursige ang pag-open sa klase nga until now murag dili paman ready? And madismaya ta ug makaingon nga kung dili gyod makaya we have to have this what we call education freeze ug sunod na lang ta… Kung baga on this particular year we are going to prepare things nga makapahimo kanato nga kanang preparado na gyod ta sa pag-open sa October 5 o sa sunod nga school year so in that sense sa gisulti ko na makahulat man ang ginatawag nato nga education pero ang kamatayon dili gyod,” baruganan ni Pardillo.




Sumala ni Pardillo, kung sanungon sa DepEd ang sugyot nga dili nalang dayonon ang pag-abli sa klase karong Oktobre may kahigayonan ang maong ahensiya nga masulbad ang mga suliran sa ilang preparasyon sa pagprinta og modules, internet access, health protocol, ug uban pa aron inig balik sa klase wala na’y problema’ng sagubangon ang mga magtutudlo nianang panahona.

Kahinumduman nga ubay-ubay na sa mga organisasyon ang nag-awhag sa Department of Education nga dili na lang una ihinayon ang pag-abli sa klase nga kapila nang nasibog karong tuiga inay sugdan na lang kini inig wala na’y hulga sa COVID-19 crisis sa nasud.

RadyoMaN Joel Viray

Facebook Comments