Davao City – Gikabalak-an sa Alliance of Concerned Teachers (ACT) Davao ang posibleng transmission sa COVID-19 atol sa gilaraw nga face to face learning sa mga low risk areas sa COVID-19 sa Enero sunod tuig.
Matud ni Alliance of Concerned Teachers (ACT) Davao City Division President Reynaldo Pardillo, kung ipadayon ang maong plano angayang siguraduhon usa sa Department of Education (DepEd) ang safety sa mga estudyante ug mga magtutudlo.
Gihagit niini ang DepEd nga mulagda og manifesto nga manubag kini kung adunay mga transmission ug infection nga mga mahitabo sa mga low risk areas sa COVID-19.
“If only the DepEd will sign into a manifesto that they will be held liable for every transmission and infection nga mahitabo sa low risk areas, if not dili lang usa ta ana,” segun ni Pardillo.
Gipasibaw niini nga kung mahimo unahon nga hataga’g pagtagad sama sa mga functional clinics ug health benefits ug facilities sa mga magtutudlo nga gikonsiderang frontliners niining giatubang nga pandemya.
Niapelar si Pardillo ngadto sa gobyerno nga matagaan gyod og dakong pondo ug suporta ang mga eskwelahan sa mga rural areas para sa ilahang mga panginahanglanon.
RadyoMaN Aimee Guinita
