Sa interbyu sa DXDC RMN Davao kang ACT-Davao City President, Reynaldo Pardillo, iyang gipasibaw nga gawas sa problema sa kakulangan sa klasrum, gikinahanglan nga mag-hire og mga personahe nga maoy mutrabaho sa mga administrative task nga makaisturbo o makaapekto sa ilang pokus sa pagtudlo sa mga estudyante.
Matud ni Pardillo, una na’ng gisaad sa Department of Education (DepEd) ang maong plano o lakang apan hangtud karon, wala gihapon kini napatuman ug nagpabiling palas-onon sa mga teaching personnel.
“Kadtong gitawag nato nga mga non-teaching activity or dili na pang-maestro nga mga trabaho, unta mahulipan o mahatagan ‘mi sa ginatawag og teacher’s aide ba na karon or (non-teaching) personnel nga makahatag og tabang sa amoa,” sulti ni Pardillo.
Sa pagkakaron, nagpadayon ang enrollment nga naka-schedule sa Agosto 7-26, 2023. Samtang, sa Agosto 29, 2023 gitakda ang pagsugod sa klase sa pampublikong mga eswkwelahan.
RadyoMaN Kirby Manzon
