Davao City – Nabalaka karon ang Alliance of Concerned Teachers (ACT-Davao Chapter) kabahin sa mga bag-ong gambalay ilabi na mga pampublikong tulonghaan tungod kay dali lang nadaut human nakasinati ug linog.
Sumala ni Reynaldo Pardillo, ACT-Davao City Division President, tungod sa sunod-sunod nga nasinatiang mga linog sa syudad, ilang nakita ang dili maayong pagkabuhat sa pipila ka mga school buildings.
Tungod niini, nanawagan ang hut-ong sa mga magtutudlo ngadto sa gobyerno nga ipasusi pag-ayo sa mga structural engineers ang ‘structural integrity’ kon kalig-on sa maong mga istruktura.
Matud ni Pardillo, kritikal ang pagsuta sa kalig-on sa maong mga edipisyo tungod kay delikado kini sa mga estudyante ug magtutudlo sa higayong adunay mahitabong mga pagtay-og kay dali ra kaayong mangliki ug matumpag.
Dugang pa ni Pardillo nga kung masayran nga adunay mga binuang sa pagbuhat sa nasangpit nga mga gambalay, angayang pahamtangan sa bug-at nga silot ang mga nagpabaya nga mga school ug building authorities.
RadyoMan Bernard Pantallon
