Davao City – Wala gililong ni Alliance of Concerned Teachers (ACT Davao City) Chapter President Reynaldo Pardillo ang iyang gibating kahadlok sa Coronavirus Disease 2019 nga usa na karon ka pandemic human mikuyanap sa 114 ka nasud sa tibuok kalibutan.
Matud ni Pardillo, dili na kakumpiyansahan pa ang mga tawo nga makauban sanglit walay kasigurohan kung kinsa kanila ang carrier sa COVID-19 nga sa pagkakaron, kapin 4,000 na ang namatay ug gatusan ka libo na ang infected sa tibuok kalibutan.
Segun ni Pardillo, daghan sa mga kalihukan sa mga eskwelahan nga nakahan-ay karong bulana gisibog sama sa cheerdance, graduation ug uban pa human naapektohan sa COVID-19.
Alang kang Pardillo, ang pag-distansiya sa kaugalingon gikan sa ubang tawo makatabang sa paglikay sa virus nga niigo na sa pipila ka dapit sa kaulohang Manila human natala ang 49 ka kaso tungod sa maong balatian.
Sa katapusang semana pa unta sa bulan sa March o bin ba kaha sa unang semana sa bulan sa April matapos ang nakalinyadang mga aktibidad sa mga eskwelahan apan gumikan sa maong balatian, mas sayo pa kini og kahuman.
Uyon si Pardillo sa ‘flexible time sa trabaho nga imbis sa mga opisina buhaton ang mga trabaho, tugtan kini diha sa mga panimalay na lamang isip alternatibo nga pamaagi sa paglikay sa COVID-19.
Walay pagsupak si Pardillo sa lakang karon sa Department of Education (DepEd) nga i-suspend lamang una ang graduation ceremonies sa mga tulonghaan, commencement exercises ug daghan pang kalihukan samtang dili pa maulian ang Pilipinas karon gikan sa pagkuyanap sa nasangpit nga balatian.
Gidasig usab ni Pardillo ang nasudnong gobyerno nga hatagan usab og konsiderasyon ang mga magtutudlo nga makatrabaho sila sa ilang mga balay lamang aron sa ingon makalikay ug dili sila mataptan sa mao nga virus.
RadyoMaN Joel Viray
