TACLOBAN CITY – Mafocus an acting mayor han Catbalogan City, Samar ha mga mag-upay nga serbisyo nga matatagamtaman han mga residente han syudad durante ha iya unom kabulan nga stint kumo Local Chief Executive.
Gin-designate han Department of the Interior and Local Government (DILG) hi councilor Archie Fuentes kumo bag-o nga mayor, ginbalyuan niya hi Stephany Uy-Tan nga naatubang hin unom kabulan nga suspensyon tungod han gin-aaligar maanomalya ha pagpalit hin tuna.
Labot la kan Uy-Tan, ginsuspende gihapon hi Vice Mayor Art Sherwin Gabon, 7 nga councilors ngan 3 nga city officials.
Hi Fuentes ngan hi Acting Vice Mayor Kendall Luke Perez in lumingkod na ha ira katungdanan.
Nagpatapod an acting mayor nga waray panananggalon nga empleyado catbalogan city hall.
“Waray ako magsiring nga pananggal. Nahipausa nala ako dida han kulop nga nakada ha facebook nga nanananggal kuno ako, kamakaarawod, diri ito ansya it akon batasan.”
“Nangingilala it catbaloganon ha akon, diri ako sugad nga magpipinananggal… kamakaarawod magpipinananggal ako nga may pamilya kamo.”
Dugang nga pamahayag ni Fuentes, magpofocus hiya ha iya trabaho sugad hin transparency, accountability ngan participatory nga pan-gobyernuhan samtang nalingkod kumo mayor han syudad.
Magtatapos man gihapon an iya termino ha adlaw nga may mapili nga mayor yana nga May 2019 elections.
Nangangaro gihapon hiya hin suporta ha mga empleyado han syudad sugad man han mga residente.
Ha pagka-yana, an Sangguniang Kabataan President la an nabibilin nga myembro han City Legislative Council ngan ginhuhulat an eleksyon han federation president han mga barangay kapitan.
