Davao City – Ang paglusad og lihuk-protesta katungod kini nga gigarantiya sa balaud sa Pilipinas kansang tumong mao ang paghatag og kahigayonan alang sa tanan nga makapasibaw sa mulo batok sa gobyerno.
Karong panahona, dili lamang kadtong nagpatong na sa saktong pangedaron ang miapil sa mga rally apan lakip na ang mga kabataan nga nisalmot miani usab og pagbatikos gikan sa sektor nga wala makauyon niini.
Apan sumala ni Alliance of Concerned Teachers (ACT) Davao City Chapter Focal Person Reynaldo Pardillo, may katungod ang kabataan sa pagsalmot sa mga protesta aron masayod sila sa mga isyu sa katilingban karon.
Sa kasinatian ni Pardillo dihang anaa pa kini sa Assumption College, muagi sa saktong edukasyon sa mga isyu ang mga kabatan una pa sila hingpit buhian alang sa mga martsa sa kadalanan.
Sigun ni Pardillo, walay mga bata nga niapil kun gipaapil sa mga rally ang wala nakasabot kung unsa nga mga isyu ang ilang gibitbit ug gisinggit batok sa kagamhanan.
Gidason ni Pardillo nga ang mga kabataan maoy mupadayon sa nasugdan nga pakigbisog sa mga aktibista karong panahona.
Wala nagpasabot kay gipaapil sa kalihukan sa mga rally ang mga kabataan gigamit na sila aron batukan ug makig-away sa gobyerno apan gipatas-an lamang ang ilang kahimatngon sa mga nahitabo sa nasud.
Gani, daghan sa mga kaila ni Pardillo nga kaniadto aktibo sa mga rally apan karon nahimong maayong leader, produktibo, ug napuslan sa gobyerno karon sukwahi sa pasangil sa uban nga sagad kanila nagpabukid ug nahimong rebelde.
Aminado si Pardillo nga daghan sa mga batan-on karon wala na’y igong kahibalo or awareness hatud sa modern technology nga naghatag kanila og lingaw.
Busa dapat lamang magpasalamat ang tanan kay anaa pa’y mga naga-protesta sa dalan karon kay basin muabot ang panahon nga wala na gyu’y muapil sa mass rally ug mulaban sa mga nilupigan karon.
Kahinumduman nga nakaani og batikos gikan sa katawhan ang Saluglungan Ta Tanu Igkanugon tungod sa paggamit sa kabataang lumad sa protesta batok sa Department of Education-XI nunot sa pagsira sa 55 nila ka mga tulonghaan sa tibuok rehiyon.
RadyoMaN Joel Viray
