ACTS Teachers Partylist: Supak sa pagpa-undang sa free higher education

Davao City – Gibarugan sa ACTS Teachers Partylist nga sila dili uyon sa sugyot ni Finance Secretary Benjamin Diokno nga undangon ang Universal Access to Quality to Free Higher Education sa mga State Universities and Colleges sa nasud kay tungod matud pa kini ‘unsustainable’ ug ‘anti-poor’.

Sa pakighinabi ni RadyoMan June Duterte atol sa Straight to the Point Morning Edition kang ACTS Teachers Partylist Rep. France Castro, gibutyag niya nga dako silang supak niini tungod daghan na og mga estudyante ang nakabenipisyo sa maong balaod ug di sab ni matawag nga anti-poor kay daghang mga ubos nga pamilyang nanginahanglan ang natabangan na mapahuman ang ilang anak sa pag eskwela.

Kini gitubag ni Commission on Higher Education (CHED) chairperson Prospero de Vera III niadtong Miyerkules, Agosto 23 sa senado, matud pa niya nga isa sa pinakamaayong lakang aron mabatukan ang kakabos sa nasud, angay nga ipadayon ang pagpatuman sa balaod nga nagahatag og libreng edukasyon sa kolehiyo sa estado.

Sa pagkakaron, kauban sa ACTS Teachers Partylist, hinaut sab pipila ka mga grupo ug organisasyon sa Pilipinas nga imbes kini wagtangon, mas maayong kini tutukan, palambuon ug mas padak-an ang pondo.

RadyoMaN Ivy Parido