Kun aduna may pinaka apektado labaw sa tanan sa nahitabong gyera sa Marawi City, kana mao ang pag-eskwela, panginabuhian ug ang kaugmaon mismo sa atong mga kabatan-onan.
Sama sa pagpabarug pagbalik sa Marawi, gi-apil usab og pag-rebuild ug pag-reconstruct ang kinabuhi sa mga apektadong kabatan-onan sa syudad pinaagi sa gipahigayong ‘Bangon Marawi Youth Camp’ sa Marantao, Lanao del Sur.
Sa press briefing sa Malacañang, gisaysay ni Provincial Crisis Management Committee (PCMC) spokesman Zia Alonto Adiong nga adunay 50 ka mga displaced youth gikan sa mga evacuation sites sa Iligan City, Cagayan de Oro ug Marawi ang gipa-apil.
Sumala ni Adiong, gikinahanglan apilon ang kabatan-onan aron makondisyon ang huna-huna nila diin malagmit nga pinaagi niini, hinay-hinay usab nga mawagtang ang ‘violent extremism’ ug ‘violent ideology’ nga maoy nag-unang ugat sa gyera o kagubot.
Subay usab sa Oplan Bangon Marawi, naghatag karon og suporta ang lokal nga panggamhanan sa Lanao pinaagi sa full academic scholarship sa 500 ka mga estudyante sa grade school ug high school ug 1,000 ka mga batan-on usab sa kolehiyo ang natabangan.
Dugang sa tigpamaba sa Marawi rehab efforts, subling ablihan ang 12 sa 22 ka mga eskwelahan nga na-damage og maayo sa maong gyera diin pito niini magsugod og regular nga klase sa Disyembre 16 ning tuiga.
“Peace is not just a word but should be a responsibility and enacted by everyone,” panapos nga pamahayag ni Adiong.
RadyoMaN Jason Amisola
