Jamindan, Capiz- Ginpatigayon sang nakaligad nga adlaw sang Sabado, Oktubre 27 2018 ang pagtililipon sa banwa sang Jamindan sang mga indigenous peoples nga Panay Bukidnon.
Suno kay Municipal Tourism Officer designate kag IP Focal Person Icyll Franco Luces, ini ang gintambongan sang mga tumandok nga halin sa mga barangay sang Agbun-od, Ganzon, San Juan, Jaena Sur, Jaena Norte kag Brgy Agloloway sa diin ginrekognisar ang ila nga komunidad kag kultura.
Ang amu nga aktibidad nga gintig-ulohan nga “Adlaw Et Tumandok” ang ginsugoran pinaagi sa ginatawag nga “Paubok sang Kamangyan” nga ginpangunahan ni Council of Elder Mr. Jerson Zonio halin sa Brgy Ganzon.
Ang “Paubok sang Kamangyan” ang isa ka ritwal antes nga mag-umpisa ang isa ka salo-salo ukon handa kun sa diin ginalawag ang mga miembro sang pamilya nga mga nagtaliwan na para mag-ambit sa amo nga selebrasyon kag ginahatagan sang porsiyon sang handa nga ila man salohan.
Nagpasundayag man ang mga ini sa pagsaot sang tradisyonal nga Binanog Dance sang Panay Bukidnon kag cultural performance nga ginatawag “Ambahan” halin kay Mr. Samuel Francisco sang Brgy. Jaena Sur.
Samtang gintalakay man ni Atty. Hermie Jun Toledo ang angut sa IPRA 8371 ukon ang Indigenous People’s Rights Act of 1997 sa diin nakapagkit ang mga kinamatarong sang IPs ukon tumandok.
Nahibaloan nga ang kada bulan sang Oktubre, ginaobserbar ang pungsodnon nga Indigenous Peoples (IP) month celebration.
photo © Shining Jamindan Tourism FB page
