CAPIZ – Ginpangunahan ni Office of the Civil Defense VI, Regional Director Jose Roberto Nuñez ang ginpatigayon nga Aerial survey sa mga lugar nga ginbaha sa probinsya sang Capiz kaina sang aga. Kalakip sa mga nag-upod sa amo nga survey ang mga katapo sang PDRRMO sa pagpanguna ni Action Officer Speed Pelaez, representante nagikan sa DSWD, Capiz Provincial Government kag mga katapo sang media.
Gamit ang duha ka mga helicopter sang Philippine Air Force ginlibot sang nasambit nga mga opisyal ang mga lugar nga lubog sa tubig baha. Katuyuan sini nga hibaluon ang kabug-usan nga halit sang malapnagon nga pagbaha nga tuga sang wala untat nga pag-ulan kadungan sang pagpanalasa sang Bagyong Agaton.
Una na nga ginpahayag ni Director Jose Roberto Nuñez nga isa ini sa iya pagabasehan nga mapalab-ot sa national government ang kahimtangan sang Capiz sa ti-on sang pagbaha. Pinaagi man sini, makapangayo sang nagakaigo nga ayuda ang iya talatapan sa mga ahensya sang gobyerno agud mabuligan ang mga apektado sang kalamidad sa bug-os nga probinsya.
*Photo Credits: PDRRMO, Aksyon Tabang*
