AFP Chief: CPP-NPA pulbuson hangtud sa katapusan sa 2018

147

Davao city- Gipalanog ni AFP Chief of Staff General Eduardo Año nga sunod pulpugon sa Militar ang CPP-NPA-NDF karon nga natapos na ang gyera kontra teroristang Maute Group sa Marawi City.

Atol sa iyang pagbisita kagabii sa mga sundalo sa Eastern Mindanao Command, gibatbat ni Año nga sunod target sa militar ang CPP-NPA-NDF karon humana ang Maute Group.


Pursigido si Heneral Año nga tapuson ang CPP-NPA-NDF hangtud sa katapusan sa 2018 aron gawasnon na ang tanang sektor ug labaw na ang mga lumad gikan sa kabangis sa mga komunista.

Sigun pa sa opisyal nga dugang napulo ka Infantry Battalion ang gi-activate ug ang unom niini anaa na sa area sa EASTMINCOM ug samtang ang laing upat gikatag sa Visayas area.

Gawas niini, target sa armadong kusog sa Pilipinas nga makahimo og 10 mil ka bag-ong sundalo kung asa nakumpleto na ang unang lima ka libo ug ang laing lima ka libo sa buwan sa Enero sunod tuig.

Pokusan sa operasyon sa militar ang Mindanao ug labaw na gyod sa Davao Region kung asa nanukad ang dakong puwersa sa CPP-NPA-NDF sa tibuok nasud.




Gitinguha sa AFP nga dungan sa pagtapos sa termino ni Pangulong Rodrigo Duterte sa 2022 mahuman na usab ang suliran sa insurhensiya sa nasud.

Ug mao lamang kuno kini ang bugtong pamaagi aron hingpit matilawan ang kalinaw ug mabantog ang pilipinas sa natad sa kalamboan sa mga nasud sa Southeast Asia, dugang ni Año.

RadyoMan Joel Viray

Facebook Comments